Ermənistan vətəndaşı Davit Manukyan Qarabağda törətdiyi terrorçuluq cinayətlərinə görə həbs edilib. Dövlət Təhlükəsizliyi Xidmətinin məlumatına görə, Manukyan “Dağlıq Qarabağ Respublikasının Müdafiə Ordusu komandanının birinci müavini” adı altında Azərbaycan ərazisində qanunsuz mütəşəkkil silahlı birləşmələrin fəaliyyətinin təşkilində və idarə edilməsində, silah-sursat, partlayıcı maddə və qurğularla təchiz edilməsində iştirak edib.
Eyni zamanda o, həmin terrorçu dəstələr vasitəsilə Azərbaycanda ictimai təhlükəsizliyi pozmaq, əhali arasında vahimə yaratmaq, dövlət hakimiyyət orqanları və beynəlxalq təşkilatlar tərəfindən qərar qəbul edilməsinə təsir göstərmək məqsədilə terror aktlarının törədilməsinin təşkilində iştirak edib. Səbail Rayon Məhkəməsində Davit Manukyan barəsində Dövlət Təhlükəsizliyi Xidmətinin İstintaq İdarəsinin təqdimatına baxılıb. Məhkəmə tərəfindən Davit Manukyan barəsində 4 aylıq həbs-qətimkan tədbiri seçilib. Qeyd edək ki, Davit Manukyan ötən gün Laçın sərhəd keçid məntəqəsində saxlanılıb. Həmçinin “Artsax”ın keçmiş “polis rəisi”, “baş prokuroru”, “təhlükəsizlik xidmətinin rəhbəri”, hətta Şuşanın icra qurumunun “başçısı” vəzifələrində çalışmış, general Arşavir Haramyan da saxlanıb. Arşavir həm də sinəsində “Artsax qəhrəmanı” dəmir-dümürünü gəzdirənlərdən olub. Tərcümeyi-hallarından görsənir ki, hər ikisi 90-cı illərdən Miatsum hərəkatının (Qarabağın Ermənistana birləşməsi) hərbi qanadını təmsil ediblər, səhra komandirləri olublar və Azərbaycana qarşı vuruşublar. Onlarla yanaşı, Dövlət Sərhəd Xidmətinin əməkdaşlarının sayıqlığı nəticəsində qondarma “Dağlıq Qarabağ Respublikasının Müdafiə naziri” vəzifəsində çalışmış 1965-ci il təvəllüdlü Lyova Henrixi Mnatsakanyan Azərbaycandan Ermənistan istiqamətində hərəkət etməyə cəhd göstərərkən saxlanılıb.
Politoloq Turan Rzayev deyib ki, axtarışda olan 300 nəfərlik terrorçu-separatçı siyahıdakı şəxslərin böyük qismi Birinci Qarabağ müharibəsi zamanı Azərbaycana qarşı etnik təmizləmə siyasətində aktiv şəkildə iştirak edən ermənilərdir. Ekspertin sözlərinə görə, həmin şəxslərin bir çoxu daha sonra həm Ermənistan daxilində, həm də qondarma qurumda müxtəlif vəzifələr tutublar: "Bildiyimiz kimi, həmin şəxslərin həbs proseslərinə başlanılıb. Laçın Nəzarət Buraxılış Məntəqəsindən getmək istəyən şəxslər aşkarlanır. Azərbaycan bu məsələdə prinsipial mövqe sərgiləyir və geri addım atmaq niyyətində deyil. 300 nəfərin hamısı olmasa da, ən azından 100 nəfərə yaxın şəxsin həbs məsələsi reallaşdırıla bilər. Nəzərə almaq lazımdır ki, Azərbaycan bunun üçün həmin şəxslərin bir çoxunu beynəlxalq axtarışa verib. Onlar başqa ölkəyə getsələr də orada aşkarlanıb Azərbaycana təhvil verilə bilər. Bundan əlavə ölkələr arasında hüquq sahəsində və məhbusların mübadiləsinə dair sazişlər var. Azərbaycan bu tipli müqavilələrdə çox aktivdir. Həmin şəxslər Qarabağdan qaça bilsələr də, başqa ölkələrdə saxlanıldığı təqdirdə Azərbaycana gətirilməsi mümkündür”.
Politoloq Elxan Şahinoğlu bildirib ki, Ermənistan və elə Qarabağ erməniləri arasında Ruben Vardanyanın nüfuzu olmasa da, İrəvan onun sərbəst buraxılması üçün kampaniyaya başlayıb: "Bir sıra ölkələrdən də bu kampaniyaya qoşulanlar var. Ancaq hazırda ermənilər mürəkkəb vəziyyətə düşüblər. Məsələ burasındadır ki, Azərbaycanın hüquq-müfahizə orqanları Ruben Vardanyanın ardınca, separatçıların digər “liderlərini” də həbs ediblər və bu proses davam edir. Əgər Ermənistan erməni lobbisi ilə birgə ancaq Ruben Vardanyan üçün kampaniya təşkil etsə, bu, həbs olunan digər separatçılara münasibətdə “ayrı-seçkilik” kimi dəyərləndiriləcək. Belə çıxacaq ki, Ruben Vardanyanın pulu və müxtəlif ölkələrdə əlaqələri var deyə ona xüsusi münasibət göstərilib. Ona görə də həbs olunanların sayı artdıqca Ruben Vardanyanın məhkum statusu digərlərinkindən fərqlənməyəcək".
